You are here
Home > Latest News > మనది డ్రైవర్‌లెస్ మెట్రో రైల్.. దేశంలోనే ప్రథమం!

మనది డ్రైవర్‌లెస్ మెట్రో రైల్.. దేశంలోనే ప్రథమం!

Spread the love

మనది డ్రైవర్‌లెస్ మెట్రో రైల్.. దేశంలోనే ప్రథమం!

మెట్రో రైల్ ఎప్పుడు పరుగులు పెడుతుందా అని హైదరాబాద్ వాసులు కళ్లు కాయలుకాసేలా ఎదురుచూస్తున్నారు. మొత్తానికి నవంబర్‌లో ప్రారంభిస్తామని ప్రభుత్వం ప్రకటించింది. ఇప్పటికే చాలా చోట్ల మెట్రో లైన్లు, స్టేషన్లు నిర్మితమయ్యాయి. ఏక స్తంభాలపై స్టేషన్లను నిర్మించి ఇంజనీరింగ్‌ అద్భుతాన్ని ఆవిష్కరించింది ఎల్ అండ్ టీ సంస్థ. ఇదిలా ఉంటే దేశంలో ఏ మెట్రో రైల్‌ వ్యవస్థకూ లేని అత్యాధునిక సాంకేతిక పరిజ్ఞానంతో హైదరాబాద్ మెట్రో రైల్‌ నడవనుంది. డ్రైవర్ లేకుండా సాంకేతిక పరిజ్ఞానంతో పరుగులు పెట్టనుంది. కంట్రోల్ రూమ్ నుంచి నిపుణుల పర్యవేక్షణలో డజన్ల కొద్ది రైళ్లు డ్రైవర్లు లేకుండానే నడుస్తాయి.

సీబీటీసీ(కమ్యూనికేషన్‌ బేస్డ్‌ ట్రైన్‌ కంట్రోల్‌) అనే సాంకేతిక పరిజ్ఞానంతో మెట్రో రైళ్లను నడపనున్నారు. 72 కిలోమీటర్ల పరిధిలో మూడు కారిడార్లలో 57 మెట్రో కోచ్‌ల నియంత్రణ మొత్తం ఉప్పల్‌లో ఏర్పాటు చేసిన ఆపరేషన్‌ కంట్రోల్‌ సెంటర్‌ నుంచే సాగుతుంది. దేశంలో మరే మెట్రో రైల్‌ వ్యవస్థకూ ఈ ప్రత్యేకత లేదు. ఇదొక్కటే కాకుండా మరెన్నో అంశాల్లో అత్యాధునిక సాంకేతిక పరిజ్ఞానం మన హైదరాబాద్‌ మెట్రో రైలు సొంతం. వచ్చే నెలలో ప్రధాన మంత్రి నరేంద్ర మోదీ చేతుల మీదుగా హైదరాబాద్ మెట్రోను ప్రారంభించనున్నారు. తొలి విడతగా నాగోల్‌–అమీర్‌పేట్‌ (17 కి.మీ), మియాపూర్‌–అమీర్‌పేట్‌ (13 కి.మీ).. మొత్తంగా 30 కి.మీ. మార్గంలో మెట్రో పరుగులు తీయనుంది. ఈ నేపథ్యంలో మన మెట్రో ప్రత్యేకతలను ఇప్పుడు తెలుసుకుందాం..

1. హైదరాబాద్ మెట్రో రైలుకు మొత్తం మూడు కోచ్‌లు ఉంటాయి. రైలుకు రెండు వైపులా ఇంజన్‌ వ్యవస్థతో కూడిన కోచ్‌లుంటాయి. వీటికి డ్రైవర్లు ఉండరు. పూర్తిగా కంప్యూటర్‌ ద్వారా నియంత్రిస్తూ రైళ్ల షెడ్యూళ్లను రూపొందిస్తారు. డ్రైవర్ల అవసరం లేకుండానే సాంకేతిక పరిజ్ఞానంతో కచ్చితంగా మెట్రో రైళ్లను నడుపుతారు. దేశంలోని ఇతర మెట్రో రైళ్లకు ముందు వెనుక ఉన్న ఇంజన్ కోచ్‌లలో డ్రైవర్లు ఉంటారు.
2. ప్రయాణికుల భద్రత కోసం కంప్యూటర్‌ బేస్డ్‌ ఇంటర్‌లాకింగ్‌ సిస్టమ్‌ను మెట్రో రైళ్లలో ఏర్పాటు చేస్తున్నారు. అత్యవసర సమయాల్లో రైళ్లను ఆపేందుకు ప్యాసింజర్‌ ఎమర్జెన్సీ స్టాప్‌ ప్లంగర్స్‌ను మెట్రో ప్లాట్‌ఫామ్‌, స్టేషన్లలో ఏర్పాటు చేస్తున్నారు.
3. మెట్రో స్టేషన్లు మొదలు కొని ప్రతీ మెట్రో కోచ్‌లో సీసీ కెమెరాలు ఉంటాయి. ప్రతి దృశ్యం రికార్డయ్యేందుకు వీలుగా అతిపెద్ద డాటాబేస్‌ సిస్టం ఏర్పాటు చేశారు. ఎక్కడ ఎలాంటి అవాంఛనీయ సంఘటనలకు చోటు లేకుండా నిరంతర నిఘా ఉంటుంది. విమానాశ్రయాల్లో మాత్రమే ఉండే ఇలాంటి భద్రతను మెట్రో రైల్‌ వ్యవస్థలో కల్పిస్తున్నారు.

Top