విభజన ప్రకటన వచ్చే దాకా ఆందోళన చేస్తాం :టీఆర్‌ఎస్ ఎంపీ కవిత

ఉమ్మడి హైకోర్టు విభజనపై కేంద్రం ఎందుకు జాప్యం చేస్తుందని టీఆర్‌ఎస్ ఎంపీ కవిత ప్రశ్నించారు. లోక్‌సభ వాయిదా అనంతరం ఎంపీ కవిత మీడియాతో మాట్లాడారు.   గతంలో రాష్ర్టాల విభజన జరిగినప్పుడు హైకోర్టు ఏర్పాటులో ఇంత జాప్యం ఎప్పుడూ జరగలేదని గుర్తు చేశారు. కేంద్రం కాలపరిమితితో కూడిన స్పష్టమైన ప్రకటన చేయాలన్న కవిత.. ప్రకటన వచ్చే వరకు ఆందోళన కొనసాగిస్తామన్నారు. కేంద్రప్రభుత్వం చొరవ చూపి వెంటనే హైకోర్టు ఏర్పాటు చేయాలని డిమాండ్ చేశారు. గతంలో ఏపీ స్థలం ఇవ్వలేదని, భవనాలు లేవని సాకులు చెప్పారని గుర్తు చేశారు. ఇప్పుడు సుప్రీంకోర్టుపై నెపం నెట్టడం భావ్యం కాదన్నారు.

అటు మూడున్నరేళ్లు గడిచినా హైకోర్టు ఏర్పాటు చేయకపోవడం దురదృష్టకరమన్నారు ఎంపీ జితేందర్‌ రెడ్డి. చట్టసభల వేదికగా ఇచ్చిన హామీని కేంద్రం నెరవేర్చడం లేదని మండిపడ్డారు. తెలంగాణకు ఇచ్చిన హామీలపై ఈ సమావేశాల్లో పోరాడుతామన్నారు.

విభజన చట్టం ప్రకారం తెలంగాణకు హైకోర్టు ఏర్పాటు చేయాలని మరో ఎంపీ వినోద్ డిమాండ్ చేశారు. ఉమ్మడి హైకోర్టు రెండు రాష్ట్రాలకు న్యాయం చేయలేకపోతుందన్నారు.

————-